Холын зайн гүйлтийн тамирчид ойрын өдрүүдэд амжилт арвинтай байна. Тэд хилийн чанадад зохион байгуулсан тэмцээн уралдаанд оролцсоноор хувийн болон улсын чансаагаа ахиулсаар байна. Тийм нэгэн амжилтын эзэн нь олон улсын хэмжээний мастер Б.Мөнхзаяа юм. Тэрбээр БНХАУ-ын Шанхай хотод зохион байгуулсан олон улсын уралдаанд 33.31 (Pace 3:18) амжилтаар дөрөвдүгээр байрт шалгарч, эмэгтэйн төрөлдөө Монгол Улсын дээд амжилтыг шинэчлэн тогтоолоо. Үндэсний шигшээ баг, “Алдар” спорт хорооны тамирчин тэрбээр Парисын зуны олимпоос хойш оролцсон уралдаан бүрдээ эх орныхоо нэрийг өндөрт өргөж байгаа юм.
Хөнгөн атлетикийн тамирчдаас онцлох өөр нэгэн нь Үндэсний шигшээ багийн тамирчин Д.Гантулга. Тэрбээр БНХАУ-ын Чэндү хотод болсон хагас марафон гүйлтийн Зүүн Азийн аварга шалгаруулах тэмцээнээс мөнгөн медальтай ирсэн байна. Энэхүү тэмцээнд манай улсаас эрэгтэй гурав, эмэгтэй гурван тамирчин уралдсанаас Д.Гантулга 1:05.07 цагийн амжилтаар замаа дуусгаж, мөнгөн медалийн эзэн болжээ.
Б.Сийлэн
Эх сурвалж: Монголын үнэн сонин №041/24620/
°C
Сэтгэгдэл (0)
Сэтгэгдэл бичигдээгүй байна