Хятад, Монголын уран зохиолын солилцооны шинэ хуудсыг нээж байна

Монголын Зохиолчдын эвлэлийн дэд дарга, яруу найрагч П.Нямлхагва “Бүс ба Зам” төслийн хүрээнд Монгол Улсад айлчлал хийсэн Хятадын зохиолчдын төлөөлөл зургаан хүний бүрэлдэхүүнтэй багийг хүлээн авч уулзав. Монголын Үндэсний номын санд болсон уг уулзалтаар утга зохиол, соёлын солилцооны талаар санал солилцож, хэлэлцүүлэг өрнүүллээ. Уулзалтад “Болор цом”-ын эзэн, яруу найрагч С.Начин, Б.Жамбалдорж нар оролцсон юм.

Монголын Зохиолчдын эвлэлийн дэд дарга П.Нямлхагва уулзалтыг нээн үг хэлж, Монголын зохиолчдын уран бүтээлийн ололт амжилт, өнөөгийн төлөв байдлын талаар танилцуулав. Тэрбээр Монгол, Хятадын уран зохиолын орчуулгын ололт амжилт, залуу зохиолчдын боловсрол, бүтээлч солилцоог бэхжүүлэх талаар илүү их ажил хийх ёстойг онцолсон юм. Ингэснээр хоёр орны утга зохиол, соёлын солилцоо улам гүнзгийрнэ гэж үзэж байна гэдгээ илэрхийлэв.

Хятадын зохиолчдын төлөөлөгчдийн ахлагч Жао Янь Бяо “Бидний Монгол Улсад хүрэлцэн ирсэн зорилго бол нэгдүгээрт, Хятад, Монголын дипломат харилцаа тогтоосны 75 жилийн ойг тэмдэглэнгээ Монголын соёл, зохиолчдын уран бүтээлийг сонирхож мэдэн, Монголын зохиолч, орчуулагч, ард түмэнд Хятад болон Хятадын уран зохиолын хөгжил, өнөөгийн бодит байдлыг таниулах юм. Хоёрдугаарт, Монголд Хятадын эртний болон түрүү зууны нэрт зохиолчдын бүтээл орчуулан хэвлэгддэг. Энэ ажлыг шинэ зуунд үргэлжлүүлэн өрнүүлэхэд анхаарч байна.

Гуравдугаарт, Монгол Улсын хөгжил бүтээн байгуулалтад асар их хувь нэмэр оруулж буй Хятадын ААН-үүдийн хөдөлмөр зүтгэлийг сурвалжлан бичнэ” хэмээн онцлов.

Зохиолчид хоёр орны соёлын солилцооны хүрээнд орчуулгын ажлын талаар олон бүтээлч санал дэвшүүлж, хэрэгжих боломжтой төлөвлөгөө гаргаж, гэрээ байгуулан хамтран ажиллахаа илэрхийлэв.Уулзалтын төгсгөлд хоёр орны яруу найрагчид харилцан бүтээлээ сонордуулж, Хятадын зохиолчдын төлөөлөл Монголын Зохиолчдын эвлэлд бүтээлээ дурсгасан юм.

Жао Янь Бяо Хятадын зохиолчдын нэрийн өмнөөс Монголын зохиолчдын эвлэлийн дэд дарга П.Нямлхагвад юньнан цай бэлэглэхдээ “Цай бол Хятадын соёлыг өвлүүлэх чухал зүйл, соёл иргэншлийн чухал бэлэг тэмдэг. Эртний Торгоны зам, Цайны морины зам, арван мянган бээрийн цайны замаас эхлээд өнөөгийн “Бүс ба Зам” санаачилга хүртэл Хятадын цайны соёл дэлхий даяар өргөн тархсан. Монголчууд ч мөн эрт дээр үеэсээ цайнд дуртай, “Бүс ба Зам”-ын дагуух улс. “Ковид-19” цар тахлын үеэр монголчууд Хятадад 30 мянган хонь хандивласан нь Хятад, Монгол хоёр орны найрамдлын түүхэнд нэгэн гэгээлэг хуудсыг бичиглэсэн гэдэгт итгэлтэй байна” гэлээ.