Авто, мото спорт сонирхогчдын “олимп”-д П.Мөрөн оролцоно

Эр зоригийн шалгуур болсон “Дакар ралли-2025” уралдаанд Монгол Улсаа төлөөлөн мото спортын олон улсын хэмжээний мастер П.Мөрөн оролцоно. Сонирхол, хобби нэг үеийнхэнтэйгээ уралдаж хичээллэснээс хойш тэрбээр 10 гаруй жил энэ спорттой холбоотой яваа юм. 2009 оноос уралдаанууддаа амжилттай оролцож урам авсан нь түүний хувьд өнөөдрийн эхлэл байв. Мото спорт түүний амьдралын салшгүй нэг хэсэг болж туршлага хуримтлуулах уралдаанд хурд хүчээ сорьсоор иржээ. П.Мөрөнгийн өвөө, аав, ах нар нь бүгд мотоциклоор уралддаг байсан нь түүнд ирээдүйд хэн болох, хаана хүрэхээ тодорхойлоход замчилсан болов уу. Өдгөө 27 настай тэрбээр удам дамжсан тамирчин бөгөөд аав А.Пүрэвдорж нь мото спортын олон улсын хэмжээний мастер цолтой.  

Тамирчин хүний хамгийн  их эмээдэг, хэлж ярихыг цээрлэдэг зүйл нь гэмтэл бэртэл. Тиймээс уралдаанаас өмнө бэлтгэлээ сайн хангаснаар эрсдэлийг даван туулах боломж нэмэгддэг. Харин хэлж ирдэггүй саад бэрхшээл тулгарахад сэтгэлийн хат, хайртай дотнын хүмүүсийн тус дэмээр туулаад гардаг нь жам юм. П.Мөрөнгийн хувьд гэмтэл бэртэл авсныхаа дараа ч бодолд нь мото спорт уяатай явжээ. Тийм нэгэн үйл явдал 2016 онд болсон бөгөөд П.Мөрөн спортоо түр завсарлах шаардлагатай болсон байна. Бэртэл гэмтлийн дараах дөрвөн жил үнэндээ түүний хувьд шалгуур байж. Энэ хугацаанд сургуульд сурахын зэрэгцээ хүсэл сонирхлыг нь татах шинэ зүйлийн эрэлд гарчээ. Спортын өөр төрлөөс сонгон хичээллэх боломж байгаа эсэхийг судалж хэсэг хугацааг өнгөрүүлсэн ч бэртэл гэмтэл илааршсан тухай эмчийн хэлснийг сонсоод мото спортоороо үргэлжлүүлэн хичээллэхээр шийдсэн байна. Оролцох уралдаанаа товлож дахин зам дээр гарах болсноо гэр бүлийнхэндээ хэлэхэд хүлээж аваагүй нь мэдээжийн хэрэг. Гэхдээ л түүний хүсэл зорилгыг мэддэг учраас гэр бүлийнхэн нь дэмжихээс өөр аргагүй байсан биз. П.Мөрөн 2009 оноос хойш эх орондоо болсон 73, олон улсын 10 уралдаанд оролцохдоо 45 алт, 19 мөнгө, долоон хүрэл медаль хүртжээ.  Түүнчлэн “Дакар ралли”-д уралдах Монголын 13 дахь тамирчин, мотоциклоор уралдах долоо дахь монгол хүн болж байна. “Торгоны зам” раллид  түрүүлж, анхны аваргын цомыг эх орондоо авчирснаас гадна өнгөрсөн жил Абу Дабид болсон олон улсын тэмцээний аравдугаар байрт эрэмбэлэгдсэн нь түүнийг 2025 оны нэгдүгээр сард эхлэх “Дакар ралли”-д хөтөлсөн юм. 
1977 оноос эхлэн зохион байгуулсан, хамгийн олон өдөр уралддаг, авто, мото спортын "олимп" гэгддэг “Дакар ралли”-ийн энэ жилийн уралдаан Саудын Арабын Биша хотод болно. Тамирчид 7500 км замыг туулах бөгөөд П.Мөрөн мотоциклын төрөлд уралдахаар бэлтгэл сургуулилалтаа өнгөрсөн есдүгээр сараас эхлүүлсэн тухайгаа ярьж байв. 46 жилийн түүхтэй энэхүү уралдаанд Монгол Улсаас анх Гавьяат тамирчин Д.Болдбаатар, олон улсын хэмжээний мастер Н.Лхамаа нар уралдсан нь 2013 он. Түүнээс хойш 2014 онд Д.Болдбаатар, Н.Лхамаа, Х.Батболд, 2015 онд Н.Лхамаа, Ө.Бямбадэлгэр, Ө.Бямбацогт, Б.Сүрэндорж, Д.Болдбаатар, Ч.Анар, Д.Жаргалсайхан, 2019 онд Н.Лхамаа, Ө.Бямбадэлгэр, Ө.Бямбацогт, 2022 онд Н.Лхамаа, Б.Баттөр, Г.Аранзал, Г.Тэмүүжин, 2024 онд Ч.Ганзориг нар уралдаж “Дакар ралли”-д нэрээ үлдээжээ. Тэднээс томоохон амжилт гаргасан нь 2019 он байв.  Перу улсад болсон 41 дэх удаагийн “Дакар ралли”-ийн 5000 км-ийн зайд Ө.Бямбадэлгэр, Ө.Бямбацогт нар UTV ангилалд хүрэл медаль, мотоциклын төрөлд Гавьяат тамирчин Д.Болдбаатар 45 дугаар байрт хурдалсан юм. Мөн 2015 онд Ч.Анар мотоциклоосоо буулгүй 72 цаг уралдсан нь онцлох амжилтуудын нэгээр нэрлэгдэж байв.

 Б.Сэлэнгэ 

 Эх сурвалж: Монголын үнэн сонин №048/24627/