Ж.Түвшинжаргал: Дуучин Б.Баярцэцэгийн тоглолт рок, поп урлагийн түүхэнд үлдэнэ

“TJ International” продюсерийн төвийг үүсгэн байгуулагч Ж.ТҮВШИНЖАРГАЛТАЙ ярилцлаа.

-Он гарснаас хойш “TJ International” продюсерийн төв гэдэг нэр цахим ертөнцийн хамгийн их хэрэглэгдсэн үгээр тодорч байх шиг байна. Хэн гэдэг хүн үүсгэн байгуулсан, ямар чиглэлээр үйл ажиллагаа явуулдаг газар вэ?

-Манай “TJ International” продюсерийн төв нь тоглолт зохион байгуулах, шинэ залуу хамтлаг дуучдын маркетинг хийх чиглэлээр олон улсад үйл ажиллагаа явуулах статустайгаар байгуулагдсан. Намайг Ж.Түвшинжаргал гэдэг “TJ International” продюсерийн төвийг үүсгэн байгуулагч бөгөөд мэргэжлийн, хөгжмийн продюсер, уран бүтээлч хүн. Би “Сонор” студийн продюсер СГЗ Н.Халиуны шавь. Анх 14 настайдаа л энэ хүний шавиар орж продюсер болохоор бэлтэгдэж эхлээд зургаан жилийн дараа 20 настай хонгор зүстэй залуу Бээжин явж байлаа. БНХАУ-ын нийслэл Бээжин хотод 10 жил амьдран суухдаа мэргэжлийн дагуу урд хөршийн шоу урлагийн салбарт хөгжмийн 12 компанитай хамтран ажиллаж туршлага хуримтлуулсан байна. Энэ олон хөгжмийн компанитай хамтран ажиллахдаа хөгжмийн компанийн ажиллах схем, мэдээлэл авах, түгээх арга ажиллагаа, хөгжмийн компани яаж ажилладаг систем, санхүүгийн туршлага, мэдлэг зэргийг нь нэг, нэгэнгүй харж судалж байлаа. Ингээд дэлхийг хамарсан цар тахал гарахын урд жил буюу 2018 онд эх орондоо ирсэн. Ирээд урд хөршид хуримтлуулсан дадлага, туршлагадаа үндэслэн “Боловсрол” суваг телевизэд “Live on”, Монголын үндэсний телевизэд “Орон даяар” зэрэг хөгжмийн хөтөлбөрүүдэд хөгжмийн найруулагчаар ажиллан, бэлтгэж хүргэдэг байв. Телевизүүдэд хөгжмийн найруулагчаар ажиллаж байхдаа миний найруулж хүргэсэн дуу Монголын хөгжмийн урлагийн салбарын бүх хамтлаг дуучдын зуу, зуугаар яригдах уран бүтээл нэрлэгдэх болов уу. Алдарт “Соёл Эрдэнэ” хамтлагаас эхлээд шинэ үеийн хамтлаг дуучдын бараг бүх тоглолтод хөгжмийн найруулагчаар орж ажилласан байна. Нэг хэсэг “Таван богд” компанийн дэргэдэх “White art” студид продюсеээр ажиллаж байлаа. Миний найруулагчаар орж ажилласан тоглолт 10 гаруй байна. “Корпорэйт” зочид буудалд Агиймаа, Маралжингоо, Хулан гэдэг гурван эмэгтэй дуучнаар дагнасан “Woman” нэртэй тоглолт зохион байгуулж байсан. Амьд хөгжимтэй маш гоё тоглолт болж билээ. Эх орондоо ирээд өөрийнхөө хэмжээнд хийсэн ажил багагүй гэдгийг тантай ярилцаж байх хооронд л мэдлээ. Хөгжим бичих, тоглолт зохион байгуулж, найруулж, промошн, маркетинг хийх ажлуудыг гүйцэтгэж иржээ.

-Таныг продюсерээс гадна хөгжим тоглодог гэж сонссон юм байна. Ямар хамтлагт тоглодог юм бэ?

-Намайг Зууны манлай эстрадын дуучин Б.Сарантуяагийн хамтлагт хөгжимчнөөр ажилладаг гэвэл та гайхаж магадгүй. Гэтэл би чинь “Рэндом” хамтлагийн хөгжимчин хүн. Сонирхуулаад хэлэхэд ирэх зургадугаар сард дуучин Б.Сарантуяагийн тоглолт товлогдсон. Би хамтлагтайгаа тоглоно.

-Таны үүсгэн байгуулсан “TJ International” продюсерийн төв дуучин Б.Баярцэцэгийн тоглолтыг зохион байгуулж байгаа. Продюсерийн хувьд таны хэд дэх тоглолт болж байгаа юм бэ?

-Өнгөрсөн жил би томоохон хэмжээний хоёр тоглолт зохион байгуулж, найруулсан байна. Эхнийх нь 2024 оны тавдугаар сарын 18-нд зохион байгуулсан “The Lemons”, “S Sound” хамтлагуудын “Live stage” тоглолт. Энэ тоглолтыг би амьд тайз, амьд хөгжимтэй хийсэн. Өөрөө амьд хөгжмийн суурьтай учраас хөгжим сонирхогч хүүхэд залуусыг амьд хөгжимд уруу татах, амьд хөгжимд дурлагч болгохыг хичээдэг. Хоёр дахь нь наймугаар сарын 24-нд Монголын рок поп урлагийн амьд домог болсон “Харанга” хамтлагийн “35 Амьдрал” тоглолт Төв цэнгэлдэх хүрээлэнд болоход манайх гол зохион байгуулагч компаниар орж ажилласан. Мэдээж маш том тоглолт учраас доороо туслах компаниуд авч ажиллаж таарна. Дуучин Б.Баярцэцэгийн тоглолт биеэ дааж ажилласан гурав дахь тоглолт гэж хэлж болно. Онцлог нь энэ тоглолтыг бид бие даан зохион байгуулж байгаа юм. Өмнөх хоёр тоглолт дээр бусад компанитай хамтран ажилласан байгаа биз. Манай хамтран зохион байгуулагчаар “АСА арена” оролцоно.

-Таны зохион байгуулах гурав дахь тоглолт өмнөх хоёр тоглолтоосоо юугаар ялгарах вэ. Монголд зохион байгуулагддаг тоглолтуудаас ялгарах ямар онцлогтой вэ?

-Дуучин Б.Баярцэцэгийн тоглолтын хувьд түүнтэй ажиллаж чадах бүх продюсерийг цуглуулаад байна. Продюсерийн төв гэдэг нэрний утга энд тайлагдаж байгаа юм. Жишээ нь “Харанга” хамтлагийн тоглолтод гэхэд л тухайн хамтлагтай ажиллах хүсэлтэй агентлаг, студи, агентуудыг цуглуулаад ажилласан. Тухайн прожектод оролцох хүмүүсээ сонгож цуглуулаад гадна, дотоод үйл ажиллагаан дээр хуваарилаад ажиллана. Б.Баярцэцэгийн энэ удаагийн тоглолт симфони оркестр хөгжимтэй, циркийн үзүүлбэрийг өөрийнх нь тоглолттой хослуулаад “Б.Баярцэцэг Live concert” болно гэж бодож байна.

-Тоглолтын нэрийг хүмүүс асуугаад байсан. Ямар нэртэй тоглолт болох гээд байна?

-Тоглолтын нэрийг эцсийн байдлаар яг тогтоогүй байна. Нэрийн олон хувилбар яригдаж байгаа. Ямар ч нэр өгсөн  “Б.Баярцэцэг Live concert” гэдэг нэрийн тодотголд заавал байх болно. Ер нь энэ тоглолт “TJ International” продюсерийн төвийн брэнд тоглолт байх болно гэдгийг би амлаж байна.

-Би эргээд “TJ International” продюсерийн төвийн талаарх ярианд ормоор байна. Ийм продюсерийн төв байгуулах санаа хаана яаж төрсөн бэ?

-Урд хөршөөс эх орондоо эргэж ирээд ажиглаж байхад Монголд энэ чиглэлээр үйл ажиллагаа явуулдаг компани маш их үгүйлэгдэж байгаа нь мэдрэгдэж байлаа. Монголд урлагийн төрлүүд олширч, тэр хэрээр энэ салбар өсөн дэвжиж, хөгжин урагшилж байсан. Гэхдээ энэ урлагийн гоо сайхныг мэдрүүлэхэд, хүмүүсийн мэдрэмжийг хөвчлөх хэмжээний тоглолт зохион байгуулдаг мэргэжлийн газар байх ёстой биз дээ. Энэ санаан дээрээ тулгуурлаад 2018 онд“TJ International” продюсерийн төвийг байгуулсан юм. Урд нь ийм продюсерийн төв байгаагүй гэж ойлгож болохгүй шүү. Эхлээд продюсерийн төвөөрөө том компаниудын захиалгын ажлуудыг хийдэг байлаа. Одоо бол компанийг 100 хувийн хүчин чадлаар ажиллуулж байгаа.

-Урд хөршийн шоу бизнесийн ер­төнцөд 10 жил болсон гэж та яри­лаа. Тэдний шоу бизнесийн зар­чим манайхаас ямар ялгаатай вэ?

-Ялгаа бий. Гэхдээ бүх л улсын шоу бизнесийн ертөнцийн ажиллах зарчим ижил. Манай шоу бизнес ийм системд орох гээд л байна. Продюсерийн ажлууд ихэвчлэн хувь хүнээр дамжиж хийгдээд байна. Миний гол зорилго бол хөгжмийн компани, продюсерийн төвүүд илүү олон нээгдэж бүх ажлуудаа системтэйгээр явуулдаг болгох. Уран бүтээлч, хөгжимчин, дуучин, зар сурталчилгаа, продюсерийн ажлууд, тоглолтын борлуулалт, билетийг нэг цэгт төвлөрүүлж компанийн статусаар явах нь хамгийн зөв. Данс тооцоо шилэн ойлгомжтой байхаас гадна улсад өгөх татвар хураамжаа ч өгөөд явчихна. Ингэж байж тоглолтын чанар сайжирна.

-Монголын шоу бизнесийн салбарыг цэгцэнд нь оруулах нь дээ гэж бодогдож  байна?

-Би цэгцлэх гээд байгаа юм биш. Зүгээр л үлгэр жишээ болохыг хүсэж байгаа юм. Ингээд цэгцэндээ ороод ирэхээр хувь хүмүүсийн албан бус харилцаа үгүй болж бүх зүйл продюсерийн компаниар дамжин хийгддэг болно. Гадаадын хамтлаг дуучдын тоглолтыг оруулж ирэх сонирхолтой продюсерийн компани “Монголын шоу бизнест нэг номерын компани аль вэ” гэхэд л бүх зүйл тодорхой байдаг ийм зарчмыг бий болгох шан татахыг хүсэж байгаа юм. Дуучин Б.Баярцэцэгийн тоглолтоор зохион байгуулах ажил ямар схемээр яаж явбал сайн юм бэ гэдгийг шоу бизнестэй холбоотой хүмүүст үлгэрлэн харуулахыг хичээж байна.

-Дуучин Б.Баярцэцэг яагаад танай компанийг сонгож тоглолтоо зохион байгуулах эрхийг өгсөн юм бэ гэдэг асуулт гарах нь зайлшгүй?

-Хувь хүнийхээ зүгээс бид хоёр бие, биенээ маш сайн мэднэ. Сайн дуучин, уран бүтээлч гэдэг талаас нь мэддэгийн хувиар Б.Баярцэцэгийн өмнөх тоглолтуудад би орж тоглодог байлаа. Бид хоёр 2008 онд Бээжинд тааралдаж билээ. Түүний “Граммафон” авсан цомог Бээжинд байх “Поло Артс” компанид бичигдсэн. Би тэр компанид тухайн үед хөгжим бичдэг байсан юм л даа. Б.Баярцэцэг дуучны хувиар менежергүй байсан учраас өөрөө шийдвэр гарган ирж дуугаа бичүүлж байлаа. Тэр үед дуучин маань ард нь асуудал үүссэн учраас тэр цомгоо бичүүлчихээд л Монгол руу буцсан. Тэр үед үлдээд цааш нь уран бүтээлээ үргэлжлүүлсэн бол өдийд Азид дийлдэхгүй дуучин болох байсан даа гэж одоо би боддог юм. Тэр цомог бүхэлдээ чанар үнэртсэн цомог болж чадсан. Ер нь түүний уран бүтээл, чанар чансааны хувьд “Поп дива” болох болзлыг хангачихсан дуучин шүү дээ. Тун удахгүй “Поп дива” Б.Баярцэцэг хэмээн дуудуулах байх гэж би бодож байгаа. Бидний үзэгч түмэндээ өргөн барих энэ тоглолт түүнийг хэдэн алхам урагшлуулах болов уу. Энэ тоглолт маань өөрөө нэг шат ахисан түүхэн тоглолт болж поп рок урлагийн түүхэнд үлдэнэ. Тоглолт дээр янз бүрийн гэнэтийн бэлэг байх болно.

-Тоглолтод хэд орчим дуу дуулагдах бол. Дуу сонголтоо яаж хийв. Үзэгчдэд хандаж юу хэлэх вэ, ямар тав тух амлаж чадах вэ?

-Дуучны гаргасан цомгуудад орсон үзэгч, сонсогчдын мэддэг дуунуудаас гадна мэдэхгүй дуунууд нь орно. Маш гоё уран бүтээлүүд. Хүмүүсийн мэдэхгүй дуу гэхээр муу уран бүтээл гэсэн үг биш. Дуу, уран бүтээлд өөрийн гэсэн цаг хугацаа гэж байдаг. Нэг дуу гараад маргаашнаас нь л хит болж эхэлдэг бол зарим дуу арав, хорин жилийн дараа сонсоод уулга алдам зүрх сэтгэл хөдөлгөсөн сайхан уран бүтээл мэт сонсогдох нь бий. Зохиогдоод олон жил болсон ч яг л шинэ уран бүтээл мэт сонсогдох тийм уран бүтээл. Түүний үнэнч сонсогчид бол сонсоод л мэдэх маш гоё уран бүтээлүүд байгаа. Түүнээс гадна “Харанга” хамтлагийн “Бүсгүйн заяа” дууг дуулсныг нь мэдэж байгаа байх.

Энэ дууг шинэчилсэн найруу­лаг­тайгаар тоглолтод оруулсан. Хүмүүсийн сонсох дуртай, аньсага чийгтүүлэх уянгалаг дуунуудаа дуулна гэх мэт дууны сонголтын хувьд өөлөх юмгүй гэж бодож байна. Бид үзэгчдийн хувьд бас нэг соёл дэлгэрүүлэх ажлыг эхлүүлж байгаа. Үзэгчид үзэх тоглолтынхоо билетийг сарын өмнөөс захиалаад авчих боломжтой байх. Цагийг нь тулгаж олдохоо байсан билетээ үнэтэй авч байсан нь дээр үү, сарын өмнө захиалчихаад санаа амар сууж байсан нь дээр үү. Тоглолтын зар явж эхлээд удаагүй ч билетийн 30 орчим хувь аль хэдийнэ зарагдсан байна.

Трамп Төмөрөө

 Эх сурвалж: Монголын үнэн сонин №002/24629/