​ “Сүхбаатарын мэргэн бууч”-д дэлхийн тамирчид өрсөлддөг

“Монголын үнэн” сонины нэрэмжит “Сүхбаатарын мэргэн бууч” 58 дахь удаагийн тэмцээн “Үндэсний шигшээ багийн бэлтгэл, сургалтын төв” ТӨҮГ-ын буудлагын зааланд болж өндөрлөлөө. Уг тэмцээнд Орхон, Сэлэнгэ, Булган, Хэнтий аймгийн багууд уламжлал ёсоор оролцсоноос гадна ОХУ-ын Буриадын БНУ-ын баг тамирчид ирж онч мэргэнээ сорьсон юм.   Тэмцээнд нийт 150 гаруй тамирчин өрсөлдсөн бөгөөд жил ирэх тусам цар хүрээ нь өргөжин тэлж хөрш орнуудын баг тамирчид зорин  оролцох болсон. Энэ нь Монголын мэргэн буучид дэлхийн хэмжээнд хүчтэй өрсөлдөгч болж чадсаны илэрхийлэл юм. 

Жил бүрийн тэмцээн техникийн нарийн ажиллагаа шаардсан, ширүүн өрсөлдөөний дунд болж өнгөрдөг. Энэ жилийн хувьд ялгаагүй “Үндэсний шигшээ багийн бэлтгэл, сургалтын төв” ТӨҮГ-ын буудлагын зааланд уур амьсгал халуун байлаа. “Монголын үнэн” сонины нэрэмжит “Сүхбаатарын мэргэн бууч” тэмцээн тухайн жилийнхээ томоохон тэмцээнүүдийн салхийг хагалж чансаа өгсөх өндөр оноо өгдөг нь өрсөлдөөнийг улам нэмдэг юм. 

Монгол Улсаас олимпын эрх авах тэмцээнүүдэд оролцох тамирчдын оноо эндээс дүгнэгдэж эхэлнэ гэсэн үг. Тийм ч учраас үндэсний шигшээ багийн дэлхийн чансааны дээгүүр эрэмбэлэгддэг тамирчид ач холбогдол өгч оролцдог. Дэлхийн хэмжээний тамирчин, аймгийн клубийн тамирчинтай өрсөлдөнө. Мэдээж аймгийн клубийн тамирчин өөрийнхөө чансааг шалгахын хажуугаар том сургалт авчихаж байгаа юм.  Тэмцээн 2025 оны хоёрдугаар сарын 2-нд нээлтээ хийж долоо хоногийн турш өрсөлдөж хоёрдугаар сарын 9-нд хаалтын арга хэмжээ боллоо. Хаалтын арга хэмжээн дээр тэмцээнд шагналт байр эзэлсэн тамирчдаа шагнаж, шинээр спортын мастерын болзол хангасан тамирчинд цол тэмдгийг нь гардуулан өгсөн. Тэмцээнийг Монголын буудлага спортын холбооны ерөнхий нарийн бичгийн дарга О.Энхсайхан, “Монголын үнэн” сонины ерөнхий эрхлэгч Б.Цоожчулуунцэцэг нар хааж үг хэлсэн юм.

Тэмцээний хамгийн өрсөлдөөнтэй төрөл болох спорт буудлагын 25 метрийн зайд “Алдар” спорт хорооны хоёр тамирчин эрэгтэй, эмэгтэй төрөлд байр эзэлснээс өөрөөр нэг клубийн тамирчид давамгайлах байдал ховор байлаа. Энэ нь Монголын буудлага клубийн тамирчид ур чадварын хувьд жигдхэн байгааг харуулна. Уг төрлийн эрэгтэй төрөлд “Алдар” спорт хорооны тамирчин, ОУХМ Э.Даваахүү алтан медаль хүртэж, “Аварга” клубийн тамирчин, ОУХМ О.Төгөлдөр мөнгөн медаль, “Хилчин” клубийн тамирчин, Спортын мастер Э.Бадамгарав хүрэл медаль хүртэв.

Үндэсний шигшээ багийн тамирчин, ОУХМ О.Есүгэн “Энэ жилийн тэмцээн өмнөх тэмцээнүүдээс илүү зохион байгуулалттай болж чадлаа. Ер нь “Сүхбаатарын мэргэн бууч” тэмцээн жил ирэх тусам чанар чансаа өндөртэй, өргөн хүрээтэй болж зохион байгуулалтын хувьд сайжирсаар байгаа нь мэдрэгдэж байдаг. Миний хувьд энэ жил тэмцээндээ амжилттай оролцлоо. Урьд жилийн тэмцээнээс авч чадаагүй медалиа авч чадсан нь энэ тэмцээнд орсон зорилго биелсэн гэж бодож байгаа. Тэмцээнд Монголын хөдөө орон нутгаас баг тамирчид ирснээс гадна ОХУ-ын Буриадын БНУ-ын буудлагын баг тамирчид ирж оролцлоо. Дотоодын тэмцээнд гаднын улсын баг тамирчид ирж оролцсон нь тэмцээний нэр хүндийг өсгөхөөс гадна тамирчдад өрсөлдөөн бий болгож байгаа нь талархууштай хэрэг юм. Ур чадварын хувьд сайн тамирчид ирсэн. Энэ тэмцээнээс хойш баг, тамирчид дөрөвдүгээр сар хүртэл дотоодын тэмцээн, уралдаандаа оролцоод, бэлтгэл сургуулилалтаа хийгээд явна. Ирэх дөрөвдүгээр сараас эхлээд Дэлхийн цом, дэлхийн аварга, Азийн аваргын тэмцээнүүд хүлээж байгаа. Би эдгээр тэмцээнд амжилт гаргах зорилготой бэлтгэл сургуулилалтаа одооноос базааж эхэлнэ. Өнгөрсөн жилийн хувьд дэлхийн хүн төрөлхтний эв санааны нэгдлийн илэрхийлэл болсон олимпын наадам БНФУ-ын нийслэл Парис хотноо болоход буудлагын  50 метрээс гурван байрлалаас буудах төрөлд шагналт долдугаар байр эзэлсэн нь хамгийн том амжилт болсон. Монгол улсаас урт бууны эмэгтэй төрөлд анх удаа финалд шалгарсан амжилт болж түүхэнд нэрээ үлдээлээ. Дэлхийн цомын сүүлийн дөрвөн тэмцээнд финалдаж чансаагаараа дэлхийд эхний 10 бичигдлээ. Чансаагаар эхний 10 бичигдсэн тамирчид урилгаар оролцдог тэмцээн байдаг. Тэр тэмцээнээс  зургадугаар байрт орсон амжилттайгаар хуучин оноо үдлээ” хэмээн сэтгэгдлээ хуваалцлаа.

Тэмцээнд оролцсон тамирчдын хамгийн ахмад нь болох Хэнтий аймгийн буудлагын шигшээ багийн ахлагч, спортын мастер Ц.Цэрэннадмид тэмцээний бүх цаг үеийн түүхийг хүүрнэх тамирчдын нэг юм.

Спортын мастер Ц.Цэрэннадмид “Монголын үнэн” сонины нэрэмжит “Сүхбаатарын мэргэн бууч” тэмцээн уламжлал ёсоор болж өнгөрлөө. Манай хөдөө орон нутгаас таван аймгийн нийт 200-аад тамирчин оролцсон өргөн дэлгэр тэмцээн боллоо. Би Хэнтий аймгийн гурван клубээс шалгарсан 20-оод тамирчинтай ирсэн. Тамирчдын сум нь цэцэн, хараа нь мэргэн байж амжилттай оролцлоо. Миний төрсөн өдөр хоёрдугаар сарын 2-нд тохиодог учраас энэ тэмцээнд би маш их ач холбогдол өгч оролцохоос гадна бэлгэшээлтэй байдаг юм. Би одоо 80 дөхөж яваа хүн гар буугаар 60 сум буудсанаас 542 оноотой 47 мэргэн буучаас 12 дугаар байрт орлоо. “Монголын үнэн” сонины нэрэмжит тэмцээн энэ жил 58 дахь удаагаа зохион байгуулагдаж байгаа бол би 43 дахь жилдээ буудлагаар хичээллэж байна. Буудлагаар хичээллэсэн 43 жилд хүндэтгэн үзэх шалтгаанаар хэдэн удаа тасарсныг эс тооцвол энэ тэмцээний түүхэнд хамгийн олон оролцсон хүний нэг нь байх болов уу” гэсэн юм.  Ахмад тамирчин Ц.Цэрэннадмид гуай тун удахгүй болох ахмад мастеруудын тэмцээнд орох гэж байгаагаа дуулгаад өөрийн хувийн клубтээ бэлтгэлээ хангана гэж байв. Монголын мэргэн буучид их жанжныхаа нэрэмжит тэмцээндээ хувийнхаа амжилтыг ахиулж, ширүүн өрсөлдөөн үзүүлсэн бахархалтайгаар нутаг, нутгийн зүг хүлгийн жолоо заллаа.

 Трамп Төмөрөө

 Эх сурвалж: Монголын үнэн сонин №005/24632/