Шигшээ багийнхан анх удаа эмэгтэй дасгалжуулагчтай боллоо

Монголын чөлөөт бөхийн холбоо “Лос-Анжелес 2028” олимпын циклийн бэлтгэлийг удирдан явуулах шигшээ багийн дасгалжуулагч, тамирчдыг бүрдүүлснээ албан ёсоор зарлалаа. Лос-Анжелесын олимпын циклд шигшээ баг долоон дасгалжуулагч, 33 тамирчинтай бэлтгэл сургуулилалтаа хийхээр болоод байна. Чөлөөт бөхийн эрэгтэйчүүдийн шигшээ багийн ахлах дасгалжуулагчаар олон улсын хэмжээний мастер Д.Гомбодоржийг томилсон бол туслахаар Ж.Чулуунбат, Г.Амархүү нарыг сонгов. Эрэгтэйчүүдийн багт нийт 14 тамирчин багтсан бөгөөд 10 нь улсын аварга шалгаруулах тэмцээнд түрүүлсэн. Харин эмэгтэйчүүдийн шигшээ багийн ахлах дасгалжуулагчаар олон улсын хэмжээний мастер С.Сүхбаатарыг томилж, Гавьяат тамирчин Б.Одончимэг, олон улсын хэмжээний мастер Ө.Ууганбаяр нар туслахаар ажиллана. Эмэгтэйчүүдийн шигшээ баг анх удаа эмэгтэй дасгалжуулагчтай болсноороо онцлогтой. Эмэгтэйчүүдийн шигшээ багт 13 тамирчин багтсан байна. Түүнчлэн сонгомол бөхийн дасгалжуулагчаар олон улсын хэмжээний мастер С.Мөнхсүхийг томилж, зургаан тамирчны бүрэлдэхүүнтэйгээр шигшээ багийг байгуулаад байгаа юм. Эдгээр шинэ бүрэлдэхүүний шигшээ авхаалж самбаагаа сорих эхний тэмцээн ирэх сарын 25-нд Йорданы Амман хотод болно. Тэнд насанд хүрэгчдийн Азийн аварга шалгаруулах тэмцээн болох хуваарьтай байгаа юм. Тус тэмцээнд оролцох эрэгтэй баг хамтарсан бэлтгэл оролцохоор Хөх хотыг зорьж, эмэгтэйчүүд нийслэлд бэлтгэлээ базааж байна.

Эх сурвалж: Монголын үнэн сонин №008/24635/