Чөлөөт бөхийн шинээр бүрдсэн шигшээ багийнхны эхний сорил нь ААШТ

Чөлөөт бөхийн насанд хүрэгчдийн Азийн аварга шалгаруулах тэмцээн энэ сарын 25-30-нд  Йорданы Амман хотод болно. Монголын чөлөөт бөхийн холбооны шигшээ багийн бүрэлдэхүүн бүрдээд удаагүй байгаа бөгөөд тэд тивийн аварга шалгаруулах тэмцээндээ хамгийн түрүүнд оролцох нь. Амманыг зорих эрэгтэй шигшээ багийн нийт бүрэлдэхүүн Хятадын ӨМӨЗО-ы Хөх хотод нэгдсэн бэлтгэлд гараад байна. Эмэгтэйчүүд Улаанбаатарт бэлтгэлээ базааж буй юм. Монголын чөлөөт бөхийн холбоо “Лос-Анжелес 2028” олимпын циклийн бэлтгэлийг удирдан явуулах шигшээ багийн дасгалжуулагч нараа бүрдүүлээд удаагүй байна. Олимпын циклд шигшээ баг долоон дасгалжуулагч, 33 тамирчинтай бэлтгэл сургуулилалтаа хийнэ. Чөлөөт бөхийн эрэгтэйчүүдийн шигшээ багийн ахлах дасгалжуулагчаар олон улсын хэмжээний мастер Д.Гомбодоржийг томилсон бол туслахаар Ж.Чулуунбат, Г.Амархүү нарыг сонгожээ. Эрэгтэй багт нийт 14 тамирчин багтсан бөгөөд 10 нь улсын аварга шалгаруулах тэмцээнд түрүүлсэн. Харин олимпын төрлийн жинд дасгалжуулагч нарын саналаар улсын аварга шалгаруулах тэмцээнээс мөнгөн медаль хүртсэн тамирчдыг багтаасан байна. Эмэгтэйчүүдийн шигшээ багийн ахлах дасгалжуулагчаар олон улсын хэмжээний мастер С.Сүхбаатарыг томилж, Гавьяат тамирчин Б.Одончимэг, олон улсын хэмжээний мастер Ө.Ууганбаяр нар туслахаар ажиллана. Түүнчлэн сонгомол бөхийн дасгалжуулагчаар олон улсын хэмжээний мастер С.Мөнхсүхийг томилж, зургаан тамирчны бүрэлдэхүүнтэй шигшээ баг байгуулжээ. Дасгалжуулагчаар ажиллахаар болсон Б.Одончимэг 2006-2016 онд шигшээ багт харьяалагдан бэлтгэл сургуулилалтаа хийж, тив, дэлхийн аварга шалгаруулах тэмцээнүүдэд өрсөлдөж байсан. Чөлөөт бөхөөр 20-оод жил хичээллэсэн бөгөөд “Алдар” спорт хорооноос дасгалжуулагчийн гараагаа эхэлжээ. 

Хэдхэн хоногийн дараа эхлэх Азийн аварга шалгаруулах тэмцээнд зодоглох бөхчүүдийн нэрийг Дэлхийн бөхийн нэгдсэн холбооны сайтад танилцуулжээ. 
Манай улсаас эрэгтэйчүүдийн жинд: 
57 кг-Б.Мөнх-Эрдэнэ
61 кг-Т.Түвшинтулга
65 кг-Ц.Цогбадрах
70 кг-Т.Тулга
74 кг-Б.Батбаяр
79 кг-О.Сүлдхүү
86 кг-Н.Батбилгүүн
92 кг-Б.Бат-Эрдэнэ
97 кг-Г.Ганхуяг
125 кг-М.Лхагвагэрэл нар барилдана. 
Мөн эмэгтэйчүүдийн жинд: 
50 кг-Б.Мөнхнар
53 кг-Ч.Отгонтуяа
55 кг-Б.Отгонтуяа
57 кг-Х.Болортуяа
59 кг-Т.Алтжин
62 кг-Я.Баасанжаргал
65 кг-Т.Энхжин
68 кг-Э.Дэлгэрмаа
72 кг-З.Болортунгалаг
76 кг-Э.Даваанасан нар зодоглохоор болсныг зарлаад байна. 

Б.Сэлэнгэ

Эх сурвалж: Монголын үнэн сонин №009, 010/24636, 24637/