Арц суурийн боомтыг байнгын ажиллагаатай болгосноор тээврийн зардлыг 2-3 дахин хэмнэнэ

Монгол Улсын Шадар сайд, УОК-ын дарга С.Амарсайханаар ахлуулсан ажлын хэсэг Завхан аймагт ажиллаж улсын нөөцөөс 495 тонн хивэг, тэжээл хөнгөлөлттэй үнээр олгосны зэрэгцээ 25 тонн дизель түлш, эрүүл мэндийн салбарт болон аймгийн онцгой комиссын албан хэрэгцээнд туулах чадвар сайтай автомашиныг шийдвэрлэж өглөө. Энэ үеэр тус аймгийн Асгат, Баянтэс, Тэс сумын нөхцөл байдалд газар дээр нь үнэлэлт дүгнэлт хийж, Асгат сумын ЗДТГ-т туулах чадвар сайтай автомашин, Тэс суманд улсын нөөцөөс таван тонн түлш, 40 тонн хивэг, тэжээл нэмэлтээр олгохоор боллоо.  Мөн Тэс, Баянтэс, Баянхайрхан, Асгат, Түдэвтэй зэрэг сумын хэрэгцээний хивэг тэжээл, түлш, шатахуун, гурил будааг Арц суурийн боомтоор оруулах боломжийг бүрдүүлж өгөх тухай орон нутгийн хүсэлтийг Шадар сайд ойрын хугацаанд шийдвэрлүүлэхэд анхаарч ажиллахаа илэрхийлэв. Арц суурийн боомтыг байнгын ажиллагаатай болгосноор шатахуун, гурил, хивэг тэжээлийг хурдан шуурхай татан авах боломж бүрдэхээс гадна тээврийн зардлыг 2-3 дахин хэмнэх боломж бүрдэх аж. Баянтэс, Тэс сумын нийт нутгаар хөр цасан бүрхүүл тогтож, хунгарласан хэсгээрээ цасны зузаан 120-160 см байна. Энэ сарын 10-наас эрс хүйтэрч, шөнөдөө 40-47 хэм хүрч хүйтрэн мал бэлчээрт гарах боломжгүй болсноос гадна зам даваа хаагдаж малчид сумын төвөөсөө өвсөө татах чадахгүй хэмжээнд хүрчээ. Баянтэс сумын дунд сургуулийн барилга шатсантай холбогдуулан хохирлыг даруй арилгах талд анхаарч ажиллахаа Монгол Улсын Шадар сайд, УОК-ын дарга С.Амарсайхан илэрхийлэв.

С.Аз

Эх сурвалж: Монголын үнэн сонин №048/24579/