Ромын шинэ папыг сонгох кардиналуудын хурлыг энэ сарын 7-нд зарлав. Энэ удаагийн чуулганаар 135 сонгогч санал өгөх эрхтэй бөгөөд нийт сонгогчдын гуравны хоёрын санал авсан нь ялах юм. Пап бол католик сүмийн тэргүүн, Ромын анхны бишоп Гэгээн Петрийн залгамжлагч гэж тооцогддог.
Тэрбээр сүмд хууль тогтоох дээд эрх мэдлийг хэрэгжүүлдэг, хууль санаачлан, өөрчлөх, хүчингүй болгох эрхтэй. Гэхдээ протестант, үнэн алдартан тэргүүтэй Христийн бусад шашинтан түүний эрх мэдлийг хүлээн зөвшөөрдөггүй аж. Католик сүмийн шинэ тэргүүнийг олон сая еврогийн төсвийн алдагдал хүлээж байна. “Ройтерс” агентлагийн эш татсанаар Ватиканы санхүүгийн зөрүү нэмэгджээ. Хэдийгээр Ватикан 2022 оноос хойш төсвийн тайлангаа бүрэн эхээр нь нийтлээгүй.
Хамгийн сүүлийн багц баримт бичигт 83 сая еврогийн алдагдал илэрчээ. Шинэ папын шийдвэрлэх шаардлагатай бусад сэдэвт санваартнуудын тоо буурсан, ЛГБТ хүмүүсийг католик шашны нийгэмлэгт хамруулах зэрэг хөндөх асуудал багтсан. Энэ удаагийн нууц санал хураалтад тэргүүлэх нэр дэвшигчээр Филиппиний кардинал Луис Тагл, консерватив байр суурьтай, Хятадтай хамтран ажиллахыг дэмждэг Италийн Пьетро Паролин нарыг нэрлэж байна. Боломжит нэр дэвшигчдийн дунд Голландын Виллем Якоб Эййк, Шри Ланкийн кардинал Малколм Ранжит, Гвиней улсын Роберт Сара нар өрсөлдөнө. Пап Франциск амьд ахуйдаа ЛГБТ иргэдийг дэмжиж, уламжлалт католик шашны хуучинсаг үзэлтнүүдийн дургүйцлийг хүргэсэн удаатай.
Эх сурвалж: Монголын үнэн сонины №016/24643/ дахь дугаарыг ЭНД-ээс уншаарай.
°C
Сэтгэгдэл (0)
Сэтгэгдэл бичигдээгүй байна