​Чингэлтэй дүүргийн Засаг даргын урилгаар Японы Яйзу дүүргийн төлөөлөгчид манай улсад айлчилж байна​

Чингэлтэй дүүргийн ИТХ-ын дарга Б.Мөнхбат, Засаг дарга Н.Батсүмбэрэл нарын урилгаар Япон улсын Яйзу дүүргийн төлөөлөгчид манай улсад айлчилж байна. 

Чингэлтэй дүүргийнхэн Яйзу дүүрэгтэй байнгын хамтын ажиллагаатай ажилладаг  бөгөөд энэ удаад  Засаг дарга Накано Хиромичи, Төрийн захиргааны удирдлагын газрын дарга Ишихара Такахиро тэргүүтэй төлөөлөгчид манай улсад хүрэлцэн ирээд байгаа  юм. Энэ сарын 5-10-ны өдрүүдэд болох тус айлчлалаар БТСУХ-той хамтран ажиллах санамж бичиг үзэглэлээ. 

Түүнчлэн төлөөлөгчид Төрийн ордонтой танилцаж, дүүргийн удирдлагуудтай уулзан, эдийн засаг, ЖДҮ-ийн хамтын ажиллагаа болон ажиллах хүчин илгээх талаар санал солилцсон юм.   Мөн энэ үеэр Яйзү хотын төлөөлөгчид дүүргийн ЖДҮ эрхлэгчдийн үйл ажиллагаатай танилцав.   

Хамтын ажиллагааны хүрээнд өнгөрсөн долдугаар сард  Яйзү хотын Засаг дарга Накано Хиромичи болон тус хотын ИТХ-ын төлөөлөгч нар Чингэлтэй дүүрэгт айлчилсан бөгөөд   дүүргийн “Хайрхан хөгжлийн төв”-ийн  үйл ажиллагаатай танилцан, тус төвийн дарга Б.Дэлгэрбаттай уулзаж, “Хамтын найрамдлын бичил төгөл"-ийг байгуулсан бол   өнгөрсөн  сард  Яйзү хотын удирдлагуудын зүгээс Чингэлтэй дүүрэгт гал унтраах авто машин бэлэглэсэн юм.  

Чингэлтэй дүүрэг Яйзү хоттой 2018 оноос хойш соёл урлаг, спортын зэрэг олон чиглэлээр  хамтран ажиллаж ирсэн. Цаашид боловсрол, эрүүл мэнд, спорт, худалдаа, аж үйлдвэр зэрэг илүү олон салбарт хамтран ажиллахаар зорьж байгаа ажээ.