В.Путин ажлаа тайлагналаа

ОХУ-ын Ерөнхийлөгч В.Путинтэй шууд холбогдох шугам уламжлалт нэвтрүүлэг дөрвөн цаг үргэлжилжээ. Кремлийн тэргүүн 80 гаруй асуултад хариулан, улсынхаа эдийн засаг, гадаад, дотоод байдлын талаар дэлгэрэнгүй мэдээлэл өгсөн байна. Тэрбээр өндөг, тахианы махны үнэ өссөнд иргэдээсээ уучлал эрж, Украинд цэргийн тусгай ажиллагаа явуулснаас хойш эдийн засаг тогтворгүй байгааг хүлээн зөвшөөрлөө. ОХУ-ын Ерөнхийлөгч цааш нь барууны орнуудын тавьсан хоригийг амжилттай даван туулж, ДНБ 3.5, цалин найм, бодит орлого таван хувиар өсгөх боломжтойг онцолжээ. Мөн ажилгүйдлийн түвшин 2.9 хувь хүртэл буурсан байна. ОХУ-ын эдийн засгийн нөхцөл байдал өнгөрсөн жилийн уналттай харьцуулахад алгуурхан сэргэж, инфляц 7.5-8 хувьд хүрэх төлөвтэй байгаа аж. Цэргийн тусгай ажиллагааны зорилго өөрчлөгдөөгүй бөгөөд Украиныг нацист үзлийн нөлөөнөөс салгах, цэрэг зэвсгээр хөөцөлдөхийг зогсоох, төвийг сахисан улс болгох юм. Олон улсын тавцанд Москвагийн эсрэг хориг үргэлжилж байгаа энэ үед ОХУ АНУ-тай харилцаагаа сэргээхэд бэлэн ч таатай нөхцөл бүрдэхгүй байгааг В.Путин тайлбарлажээ. Хоригдол солилцох асуудлаар АНУ-тай хэлэлцээр хийх боломжтой гэнэ. Газын зурваст хээрийн эмнэлэг нээхийг санал болгосон ч Израил дэмжээгүй аж. Оросын шигшээ багийн тамирчдыг Парисын олимпын наадамд оролцуулах шийдвэрийг нухацтай хэлэлцэх ёстойг Кремлийн тэргүүн дурджээ.

В.Алтантуяа

Эх сурвалж: Монголын үнэн сонин №048/24579/